SAWDIS Share Buttons

SAWDIS Share Buttons:

17 December 2011

Skermswewer val hom dood naby Porterville

Kaapstad – ’n Skermswewer wat glo nagelaat het om die harnas van sy sweefskerm vas te maak, het hom Vrydag by die Winterhoekberge by Porterville doodgeval.

Oleg Tomas (33) van Moldowa is volgens Linda Willemse, woordvoerder van die SA Wynlande Sweefskermkompetisie, op slag dood. Hy was ’n deelnemer aan die kompetisie.

’n Polisiewoordvoerder op Saron, ao. John Christians, het bevestig dat ’n skermswewer tydens die kompetisie gesterf het. Die Sweefskermvereniging en die polisie ondersoek die oorsaak van die ongeluk.

Die uitkoms van die ondersoek sal aan die Burgerlike Lugvaartowerheid oorhandig word.

Volgens Anthony Allen, woordvoerder van die Westelike Provinsie Sweefskermvereniging, het Tomas Vrydag kort ná 11:00 van Pampoenfontein, een van twee opstygplekke op die Winterhoekbergreeks, opgestyg. Die ander opstygplek is Dasklip.

Volgens Allen het hy sowat 5 km verder neergestort.

’n Medeskermswewer het aan Die Burger gesê hy het gehoor Tomas se harnas was nie vasgemaak nie en dat hy uit sy sweefskerm geval het.

Willemse, wat nie die skerm­swewer se naam aan Die Burger wou gee nie, het die voorval as baie ongelukkig beskryf. Sy het gesê hy was ’n internasionale skermswewer wat al voorheen aan die Wynland-sweefskermkompetisie deelgeneem het.

Sy het wel gesê daar was nie fout met Tomas se toerusting nie. Sy wil nie oor die oorsaak van die ongeluk bespiegel nie.

Die kompetisie het verlede Sondag begin en maak vandag klaar. Die kompetisie is kort ná die ongeluk vir die dag gestaak.

Volgens die webtuiste xccomps.­net was daar in die kompetisie plek vir 110 skerm­swewers, waarvan 28 plekke vir buitelandse skermswewers gereserveer is. Die skermswewers styg by Pampoenfontein op. Hul eindpunt is Clanwilliam, sowat 84 km verder.

Kevin Tromp van Wildernis-soek-en-redding het gesê ’n skermswewer wat aan die kompetisie deelgeneem en op die berg geval het, moes Woensdag met ’n helikopter van die berg afgehaal word. Dié persoon is volgens hom nie beseer nie.

- Die Burger